tg-me.com/amarr_hasnn/28160
Last Update:
تدري مغلق باب كلبي بس الك فاتح حنانه
بكلبي كاتبلك عبارة تدخل انته واطلع أنه
يا أبا عبد الله
١-
دخيلك يا وكت رد بيه لو عامين
اريد اشبع لطم ورتاح يم حسين
بعد بيه بجي وشوغات مال سنين
عمري شويه وهواي الدمع بالعين
عوف صدرك وخذ صدري وكسر ضلوعي بمجانه
بكلبي كاتبلك عباره تدخل انته واطلع أنه
يا أبا عبد الله
٢-
بعدني اشتم هوه وبالنار ما محروك
ولا عندي جرح لا باجي لا مخنوك
شحال العده اخت باجر تطب للسوك
كون من ابجي لجل حسين ابجي النوك
الخادم كبال اليخدمه واجب يكصر لسانه
بكلبي كاتبلك عباره تدخل انته واطلع أنه
يا أبا عبد الله
٣
ارتبك واعثر وكومن من يمر طاريك
شغل ما عندي كاعد بس افكر بيك
شنو رايك كمت من عندي اغار عليك
اطلع ومشي ورجع وأنه ما ناسيك
شعدنه يحسين احنه غيرك صعبه ننسه المانسانه
بكلبي كاتبلك عباره تدخل أنته واطلع أنه
يا أبا عبد الله
٤-
شنهي الدنيا إذا ماكو لطم وجروح
المن عايش ومحبوب ما بيه روح
انه المفروض اكضي الليل هم ونوح
لحسين الكلب ولغيره ما مسموح
الكلب محجوز لغرامك انته يا سيد سمانه
بكلبي كاتبلك عباره تدخل انته واطلع انه
يا أبا عبد الله
٥-
انه اتمنه العمر باجر يرد اردود
اريد اشبع لطم والله اللطم مريود
لتخاف اعله جسمك هوه حصت الدود
تنفعك بالكبر باجر ثياب السود
ابد ما ينفع غرورك يلي ما تحضر عزانه
بكلبي كاتبلك عباره تدخل انته واطلع أنه
يا أبا عبد الله
____
حسين عبد الجليل المالكي
BY قناة الرادود والملحن امير الفتلاوي
Warning: Undefined variable $i in /var/www/tg-me/post.php on line 280
Share with your friend now:
tg-me.com/amarr_hasnn/28160